fbpx
December 08, 2022

Mescos cu aña pasa: Otro luna atrobe Conseho di Minister lo reuni na San Nicolas

Share on Facebook
Share on Whatsapp
0
0
Mescos cu aña pasa: Otro luna atrobe Conseho di Minister lo reuni na San Nicolas
Mescos cu aña pasa: Otro luna atrobe Conseho di Minister lo reuni na San Nicolas


“Awe mi a reuni cu presidente nobo di San Nicolas Business Association – SNBA, esta Errol de Freitas riba planes di desaroyo pa San Nicolas”, asina minister-president mr. Evelyn Wever-Croes a anuncia awe. Recientemente De Freitas a asumi e funcion di presidente di e organisacion di comerciantenan di San Nicolas. E mes tabata empleado publico pero awendia ta “consultant” pa e mesun compania di ex-presidente di SNBA.

“Nos a planea tambe e siguiente reunion di Ministerraad na San Nicolas otro luna den cual Ministerraad lo haya presentacionnan di inversionistanan pa San Nicolas. Un bon reunion”, segun e prome mandatario di nos pais.

Na december aña pasa tambe a tene un reunion di Conseho di Minister na San Nicolas den cual varios inversionista a participa y a anuncia un lista di proyecto pa pariba di brug. A priminti cu lo atende e reto di burocracia pa por cuminsa mas lihe posibel. Un aña despues, ta bon pa SNBA laga sa con e proceso a canalisa pa e comerciantenan y si ta sinti un cambio den e proceduranan “red tape” den gobierno.

Casi ta nota cu reunionnan di Conseho di Minister na San Nicolas den december ta birando un tradicion, pero separa cu e show, kico en realidad ta haci pa yuda e economia di San Nicolas. Poco proyecto a cristalisa den e ultimo aña aki.

E speransa ta cu awor cu tin un presidente nobo den San Nicolas Business Association, cu lo por mira mas velocidad den e proyectonan y pa tene gobierno skerpi na nan promesanan, en bes di un relacion di un tenemento di man mucho “preta” entre e organisacion y e politiconan na mando.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.