fbpx
December 08, 2022

Marco Berlis (MEP): Coalicion di AVP den oposicion a uza strategia di ‘comedia comun’

Share on Facebook
Share on Whatsapp
0
0
Marco Berlis (MEP): Coalicion di AVP den oposicion a uza strategia di ‘comedia comun’
Marco Berlis (MEP): Coalicion di AVP den oposicion a uza strategia di ‘comedia comun’


Pa simannan largo a protesta, manda carta pa Hulanda y gobierno pa argumenta cu presupuesto 2023 tabata uno ficticio. E ponencia agresivo, desespera y den panico di parti di coalicion di oposicion encabesa pa Mike Eman, a purba sembra tur sorto di argumentonan ficticio y sin base pa laga pueblo kere cu gobierno tabata haciendo algo ilegal cu presupuesto 2023. E “manipulacion comun” aki a tuma diferente forma y a uza prensa paga di oposicion pa trata na duna forsa pa nan retorica. Ruedanan di prensa, entrevistanan na prensa paga, cartanan di desesperacion pa Hulanda y e culminacion tabata e gritamento den Parlamento prome cu oposicion a bandona sala bao di nan lider maximo Mike Eman

ARGUMENTO Y STRATEGIA DI “COMEDIA COMUN” 

Algun dia despues cu coalicion di AVP a insisti pa keda ausente na e tratamento di presupuesto 2023, pa asina trata na convence pueblo cu loke gobierno ta haciendo ta ilegal, ata CAFT a sali duna nan un golpi di bida y a pone nan cara na berguensa. Esaki a sucede despues cu nan a yena y dorna nan carta cu yen supuesto exigencia cu CAFT mester duna su consehonan awor cu a cambia BTW pa BBO. Ata CAFT a sali bisa den prensa local cu NO MESTER di duna niun conseho prome. CAFT a bisa tambe cu nan ta duna gobierno rason! Prome cu esey ya caba Dienst Wetgeving en Juridische Zaken (DWJZ), cu ta encarga pa revisa y controla leynan prome cu nan cuminsa cana nan proceso, a duna un conseho cla riba e postura di e “comedia comun” di coalicion di AVP. Den e conseho aki DWJZ ta tira e postura di oposicion den prullenbak y ta desmenti cu mester conseho di Raad van Advies of CAFT. Otro sla mortal mas pa oposicion.

PA OPOSICION EHERCE NAN TRABOU NO TA IMPORTANTE

BBO ta un ley existente cu MESTER wordo trata separa di presupuesto 2023. Esaki ta hasta na Raad van Advies caba pa e cambio haci. Pero “opotraicion” sa esaki. Nan intentonan di panico a bira asina grandi cu hasta un miembro di AVP a bay cu vakantie den exterior pa bay fiesta na grandi. Esaki ta mientras no tin reces, y tin trabao pa atende cu ne. E no a worry pasobra pueblo ta paga su salario toch! Esaki ta e grado di seriedad cu bo ta tuma e trabao di un representante di pueblo? Net esun cu ta gusta grita cu e ta representa pueblo; na unda bo tabata? Asina culpabel oposicion a sintie cu na final toch nan a bin pa vota KETO KETO, sin stem motivering, sin haci un zonido! 

AUSENCIA PA BERGUENSA

Na final, Mike ta scondi hunto cu Benny pa pueblo, no a presenta pa 7 dia di reunion publico cu a trata presupuesto 2023, no a presenta pa presupuesto supletorio 2022, no a presenta pa presupuesto di Algemene Rekenkamer, Raad van Advies y Parlamento, ni tampoco pa e tratamento di e ley pa aproba e huurovereenkomst pa varios dienst cu ta cay bao minister Ursell Arends y Rocco Tjon. Ausencia pa berguensa! Esaki ta e actitud di “bon comun” cu Mike Eman ta promoviendo? E gañamento sistematico di Mike su coalicion ta ehempel di e “bon comun” cu e ta para pe? Ban ta serio si!

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.