ORANJESTAD – Oficina di Turismo di Corsou (CTB), Asociacion di Musico y Artista di Corsou (AMAK) y Fundacion Desaroyo Carnaval Corsou (FDKK) a tene un rueda di prensa pa asina informa comunidad di Aruba di Festival di Tumba 2023 y tur loke Corsou tin di ofrece durante e dushi temporada di Carnaval.
Festival di Tumba y sigur e anochi final semper ta un atraccion pa nos bishitantenan di Aruba, esaki ta conta tambe pa e marcha di despedida riba diamars anochi. Durante e rueda di prensa, representantenan di AMAK a duna tur informacion di loke por spera durante e edishon 51 di Festival di Tumba. E popular cantantenan Rodrick ‘Rocco’ Franken, Chendell Beaumont, Jair ‘Buddy’ Vesprey, Jurick Salomon i e agrupacion musical Buleria di Aruba cu lo participa na Festival di Tumba 2023 na Corsou tambe a forma parti di e rueda di prensa.
Ademas di e rueda di prensa e team di CTB a tene un media tour pa asina duna mas informacion na e comunidad di Aruba di tur loke por spera durante Festival di Tumba 2023 y e temporada di Carnaval na Corsou. Corsou completo ta cla pa disfruta di e temporada di Carnaval y pa yama tur bishitante bon bini.
