fbpx
January 28, 2023

Hulanda a bay di acuerdo pa cambia COHO pa un ‘onderlinge regeling’

Share on Facebook
Share on Whatsapp
0
0
Hulanda a bay di acuerdo pa cambia COHO pa un ‘onderlinge regeling’
Hulanda a bay di acuerdo pa cambia COHO pa un ‘onderlinge regeling’
Hulanda a bay di acuerdo pa cambia COHO pa un ‘onderlinge regeling’
Posted on 01/13/2023 3:47 pm AST | Updated on 01/13/2023 3:53 pm AST

ORANJESTAD –  Hulanda a bay di acuerdo pa cambia COHO pa un ‘onderlinge regeling’. Asina e paisnan concerni, Aruba, Corsou, St Maarten y Hulanda a acorda diabierna na St Maarten. Tur tres premier di e islanan a confirma esaki durante un conferencia di prensa diabierna atardi. Den e ultimo dos dianan paisnan Aruba, Corsou, Sint Maarten y Hulanda tabata tin reunionnan constructivo riba e forma cu kier traha hunto den Reino. Den cuadro di esaki locual cu a resalta ta un cooperacion cu ta basa riba igualdad, ‘ownership’ y confiansa mutuo. Y cu ta cuadra cu e forma cu ta mira nos futuro hunto. Un cooperacion, cu mester conduci na implementacion di e reformanan cu lo crea mas resiliencia y desaroyo sostenibel di e paisnan.

E posicionnan di e 4 paisnan den Reino a wordo comparti abiertamente. Aki un biaha mas a enfatisa e importancia di reformanan manera confirma den e Landspakket. E deliberacionnan tabatin como meta pa haci palabracionnan adicional riba e forma cu lo traha den ehecucion di e Landspakket nan.

A logra pa yega na un acuerdo di principio riba e ‘Onderlinge Regeling’, un areglo mutuo. E areglo aki ta bin na lugar di e COHO cu a wordo proponi anteriormente. E ley di Reino di COHO a wordo entrega na Parlamentonan di e 4 paisnan, y e reaccionnan tabata critico. Aruba Corscou y Sint Maarten a tuma e iniciativa pa bin cu un alternativa cu a wordo trata e dos dianan aki. E intencion tabata pa yega na un areglo mutuo, den cual ta describi e forma di traha, forma di raporta, e sosten di Hulanda, y e duracion di e areglo. Y cu ta expresa e relacionnan den Reino a base di igualdad.

Den e dos dianan aki a traha duro pa concretisa e palabracionnan. Teamnan di conseheronan lo finalisa e palabracionnan. Ta spera cu comienso di maart 2023 por firma e acuerdo mutuo.

E 4 paisnan a palabra cu lo cuminsa deliberacionnan na februari 2023, riba e fiansanan di Hulanda den cuadro di e crisis di Corona, cu lo vence 10 di oktober 2023.

 

Apart di esey a delibera tambe riba un areglo di disputa “Geschillenregeling”. E paisnan lo warda e resultado di deliberacionnan di e Parlamentonan riba e tema aki. Tambe a papia tocante di deficit democratico y un posibel continuacion riba ehecucion di e motie van Raak. Y den e cuadro aki e paisnan a palabra di lo organisa un Conferencia di Reino.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.