NEW ORLEANS – Faltando un dia pa e certamen di Miss Universo 2022 tuma lugar, Aruba su representante Kiara Arends y Gabriela Dos Santos di Corsou ta sigui hala hopi atencion. E siman aki un potret di Associated Press di Kiara Arends a recori mundo, y a cubri varios pais cu a y ta raportando riba e certamen. E potret di e trahe di gala y esun ‘nacional’ ta esun cu a hala hopi atencion internacional. Varios experto di beyesa, conoci como missologo, tin Aruba y Corsou den e top 15. Medionan manera di Clinton, Iowa (Merca), Puerto Rico y Jamaica ta djis algun cu a usa e potretnan di Aruba como ilustracion general pa nan cobertura despues di e anochi preliminar.
MENCION
Durante e anochi preliminar, e miss Universo actual Harnaaz Sandhu (India) a anuncia cu e trahe nacional tabata traha di material resicla cu a wordo usa den e parada grandi di Carnaval ultimo. Localmente Kiara ta hayando hopi bon comentario, unda cu su beyesa ta resalta grandemente.
CORSOU
Mientrastanto medionan di Corsou a sigui e cobertura di Noticiacla y tuma e raportahe cu potret di tanto Aruba como Corsou. E representante di Corsou, Gabriela dos Santos tambe ta mustra den e favoritonan unda cu misologonan ta pone te hasta den e prome 3 nan di e certamen.
E CERTAMEN MES
E certamen ta pasa diasabra anochi pa 8’or ora di Aruba, y ta wordo transmiti pa e.o. canal TNT di Merca y DirecTV di Corsou. Noticiacla ta desea tanto Kiara Arends como Gabriela Dos Santos tur exito diasabra den e certamen final.
