Den e ultimo dos dianan e paisnan Aruba, Corsou, Sint Maarten y Hulanda tabatin reunion constructivo riba e forma cu kier traha hunto den Reino. Den cuadro di esaki locual cu a resalta ta un cooperacion cu ta basa riba igualdad, ‘ownership’ y confiansa mutuo. Y cu ta cuadra cu e forma cu ta mira nos futuro hunto. Un cooperacion, cu mester conduci na implementacion di e reformanan cu lo crea mas resiliencia y desaroyo sostenibel di e paisnan.
A comparti e posicionnan di e 4 paisnan den Reino abiertamente. Aki un biaha mas a enfatisa e importancia di e reformanan manera confirma den e Landspakket. E deliberacionnan tabatin como meta pa haci palabracion adicional riba e forma cu lo traha den ehecucion di e Landspakketnan.
A logra pa yega na un acuerdo di principio riba e ‘Onderlinge Regeling’, un areglo mutuo. E areglo aki ta bin na luga di e COHO proponi anteriormente. A entrega e ley di Reino di COHO n’e Parlamentonan di e cuater paisnan y e reaccionnan tabata critico.
Aruba, Corsou y Sint Maarten a tuma e iniciativa pa bin cu un alternativa cu a trata e dos dianan aki. E intencion tabata pa yega na un areglo mutuo, den cual ta describi e forma di traha, forma di raporta, e sosten di Hulanda y e duracion di e areglo. Y cu ta expresa e relacionnan den Reino a base di igualdad.
Den e dos dianan aki a traha duro pa concretisa e palabracionnan. E team di e conseheronan lo finalisa e palabracionnan. Ta spera cu comienso di maart 2023 por firma e acuerdo mutuo.
E cuater paisnan a palabra cu lo cuminsa e deliberacionnan na februari 2023, riba e fiansanan di Hulanda den cuadro di e crisis di Corona, cu lo vence dia 10 di october 2023.
Apart di esey a delibera tambe riba un areglo di disputa “Geschillenregeling”. E paisnan lo warda e resultado di e deliberacionnan di e Parlamentonan riba e tema aki. Tambe a papia tocante di deficit democratico y un posibel continuacion riba ehecucion di e motie van Raak. Y den e cuadro aki e paisnan a palabra di lo organisa un Conferencia di Reino.
