fbpx
January 28, 2023

Siguridad di ‘vacation rental’ ta hopi importante pa nos turismo

Share on Facebook
Share on Whatsapp
0
0
Siguridad di ‘vacation rental’ ta hopi importante pa nos turismo
Siguridad di ‘vacation rental’ ta hopi importante pa nos turismo


Recientemente a tuma nota di algun ladronicia cometi na e propiedadnan di Vacation Rental, como tambe detencion di esunnan encarga di e ladronicia. Durante e trayectoria di e lunanan cu e ladronicianan tabata tuma luga, VRPA tabata na altura di tur sucedidonan y a traha tras di cortina conhuntamente cu Cuerpo Policial pa sigui e pasonan di e ladron(nan) pa yuda detene esunnan responsabel. E sucedidonan aki ta di lamenta como cu e ta afecta e bishitante, e doñonan di e propiedadnan y na final nos turismo en general. 

Siguridad di propiedadnan di Vacation Rental ta di sumo importancia pa e experencia di e bishitante. Cu a logra captura un di esunnan responsabel, no mester descarta cu por tin mas persona envolvi y cu kisas lo continua despues di tempo cu e ladronicia. Mester keda vigilante na tur momento.

Den cuadro di mantene siguridad di propiedadnan pa den termino largo, VRPA ta duna algun conseho pa un miho practica na doñonan di vacation rental como tambe na ‘Property Managers’. Mientras cu cada vacation rental tin nan propio necesidadnan pa cu siguridad, tin algun practicanan basico primordial contra ladronicia. 

Instalacion di luz y ‘motion detectors’

Mayoria di ladronicia ta tuma luga den oranan di anochi of marduga como cu e scuridad ta duna e ladronnan mas oportunidad di camufla den scur y ta evita cu por waknan. Instalacionnan di luz y detectornan di movecion ta sende luznan y ta duna indicacion cu tin un persona riba e propiedad y ta yuda pa identifica e lardon mas facil. Tambe por instala e ‘motion detectors’ aki paden di e vacation rental. 

Automatisacion di vacation rental

Awendia hopi di e instalacionnan di automatisacion, ‘Smart’, ta duna bo control di bo propiedad for di un app den bo telefon, tablet of laptop. Sea luz of di cualkier aparato electrico, por wordo programa cu ‘timer’ pa wordo cendi of paga. Ta importante pa cada programacion di sea un luz of aparato electronico tin diferente orario cu e ta cende cada biaha pa asina no duna un patronchi cu e intruso por predeci.

‘Neighborhood watch’

Pa hopi aña por a tuma nota di varios di e barionan cu tin un ‘neighborhood watch’. VRPA ta aplaudi cu bisiñanan ta organisa como bario y tin bon comunicacion pa siguridad di tur cas den e vecindario. Pa medio di un ‘chat group’ tur bisiña tin comunicacion pa cualkier movecionnan cu no ta usual. Introduccion di un ‘neighborhood watch’ por yuda contra ladronicia. Pa vacation rentals, por notifica den e chat group na momento cu tin bishitante di vacation rentals y e duracion di nan estadia. 

Instalacion di camera di siguridad

Camera di siguridad ta esencial pa propiedadnan di vacation rentals. Instalacion di camera di vigilancia exterior di un propiedad, sea maneha pa un compania di siguridad of pa doño di e propiedad ta duna un bentaha di semper tin bista riba e propiedad. E camaranan di siguridad, awendia ta duna e doño e opcion di ricibi un notificacion den bo telefon pa cualkier movecion y sonido. Tambe tin camera cu tin un e opcion cu via di bo telefon bo por papia y alerta e persona pa e bandona e propiedad. 

Un otro opcion hopi eficiente pa e propiedadnan ta instalacion di un ‘ring doorbell’. E ‘ring doorbell’ ta un ‘doorbell’ smart cu ta inclui instalacion di camera cu ta conecta automaticamente cu un telefon y ta duna acceso ‘live’ si tin un persona dilanti bo porta di cas. Tur e tipo di instalacionnan aki ta duna doñonan di vacation rental e chens pa tuma contacto hopi mas lihe cu polis pa notifica pa cualkier movecion straño. 

Seguro

Un aspecto importante pa vacation rental ta tambe pa tin seguro contra ladronicia. Esaki sigur ta yuda den caso cu propiedadnan wordo horta como tambe ta duna bishitantenan un sentido di siguridad. 

VRPA ta conseha pa tur compania cu ta maneha vacation rentals pa haci un analisis di tur propiedad y raporta na cada propetario con por mehora siguridad di nan propiedad. VRPA ta gradici Cuerpo Policial di Aruba pa nan gran esfuerzo y trabou na resolve e casonan di ladronicianan aki, como tambe na e comunidad atento. Pa proteccion di vacation rentals y nos turismo ta imporante pa keda alerto pa cualkier movecionnan no comun, y si cualkier persona por tuma nota di algo cu no ta cuadra, por tuma contacto cu polis inmediatamente y e compania cu ta maneha e propiedad. 

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.