Algun mayor ta hopi preocupa p’e situacion di nan yiu cu no ta bayendo scol. Un alumno cu a bay SPO a hal e puntonan necesario pa bay EPB, pero ainda no por a cuminsa scol. Esaki ta bin pa motibo cu EPB ta informa cu no tin cupo tampoco pa mas alumno.
Yenny Perez, mayor preocupa, a splica cu e muchanan a sali fo’i SPO y nan tin derecho di bay EPB, pero no ta haya luga. Desde dia 9 di december e mayornan ta warda riba un supuesto yamada di EPB. El a splica cu SPO a termina na cu nan caba. Desde december Perez a yama EPB algun bes, incluso el a presenta eynan, pero a bis’e cu e mester warda riba un yamada pasobra aworaki no tin luga p’e muchanan.
E muchanan ta na cas y no ta haci nada. Enseñansa ta derecho di mucha, pasobra nan tin e derecho di siña. E muchanan a traha basta duro pa haya nan derecho di studia na EPB. Segun Perez, no pasobra tur cu ta SPO tin problema pa siña of problema di conducta. El a splica cu su yiu a bay SPO pa motibo cu nan a haya sa laat cu e mucha tin problema di oido y esey a pone cu el a tarda un tiki mas pa siña Hulandes. Despues di a drecha e problema ey, a hinca e mucha den bijles, el a bay miho na scol.
Awo e ta na nivel pa bay scol di EPB. Pero nan no a logra ainda. Esaki ta un lucha desde aña pasa. Desde comienso cu el a sali di Scol Soeur Juliette (Emmaschool) e tabata cla pa bay EPB, pero nan no a tum’e. Perez tin un aña caba ta luchando y ainda e no a logr’e pa su yiu haci eherce su derecho di studia.
DERECHO DI MUCHA
Perez a indica cu e ta un persona cu ta traha y paga su impuesto. El a enfatisa cu su yiu ta un Hulandes, ta legalisa y tin tur derecho. Su persona no ta compronde gobierno, cu si un scol ta di gobierno of no. Aki ta trata e derecho di un mucha. El a presenta na parlamento pa pidi un cita cu minister. E ta haya cu esaki ta un problema si ta scol di gobierno of no, pero ta un derecho di mucha. Nan tin cu soluciona.
DOS AÑA DI PROBLEMA
Diaranson nan tabatin un reunion y mesun vigilante na porta a bis’e cu esey ta un problema cu nan tin pa dos aña caba. E ta haya cu esey no ta su asunto, pasobra si nan tin problema, nan mes mester percura pa tur mucha haya nan luga. E kier sa unda e luga ta di e muchanan cu a bay over, cu a termina EPB.
Lesa mas den TREMPAN.
