fbpx
January 28, 2023

Stanley Clementina ‘ Mr. Kompa’: A lansa su prome single pa 2023 titula Masha Ten

Share on Facebook
Share on Whatsapp
0
0
Stanley Clementina ‘ Mr. Kompa’: A lansa su prome single pa 2023 titula Masha Ten
Stanley Clementina ‘ Mr. Kompa’: A lansa su prome single pa 2023 titula Masha Ten


Aña a habri cu gran animo y expectativa pa cantante Stanley Clementina, kende kier deleita nos cu un metodico Kompa titula “Masha Ten”. E temporada aki Stanley ta na Corsou pa participa den Festival di Tumba 2023, banda di algun presentacion.

Normalmente, Stanley ta conoci pa su propio produccionnan, cu e mes ta skirbi y composita, pero pa prome biaha, Stanley a opta pa bin cu un ‘cover’ di e cantica ‘Bon bon’ di e banda Haitiano Enposib. Loke Stanley a gusta particularmente di e cantica aki, ta cu su tononan ta zona igual cu papiamento y Stanley a uza e melodia pa skirbi su propio interpretacion y nificacion den nos idioma.

MASHA TEN

E ‘cover’ ta basa riba un experencia berdadero, unda un pareha compromete a bay un fiesta unda nan a topa cu algun amistad. Aki un amigo ta reconoce e prometida di su amigo, como un dama cu e tabatin un ‘rendezvous’ recientemente cu ne. Como bon amigo el a adverti su amigo, pero esaki no a gusta e mensahe di su amigo y a rabia masha cu e revelacion y a opta pa keda cu su pareha infiel. Stanley a graba e “MASHA TEN’ cu su banda  C-Shaw, unda el a haci e areglo.

C-SHAW

Despues di hitnan manera Quarantaine’ na 2020, sigui pa e infeccioso Kompa titula ‘Compronde’ y ‘Mi No Por Lubida Bo’, cu Kevv na 2021,
esaki ta e di dos piesa cu Stanley ta saca cu C-SHAW.  E prome tabata e bunita piesa ‘SE SUA’ na 2018 cu tambe a keda graba completamente ‘live’. Tambe Stanley tin varios plan grandi cu C-Shaw, unda e tin planea pa haci un gira cu e banda pa Aruba, Corsou y Bonaire. Stanley ta spera cu di e manera ey, nos comunidad por mira cu tin un Yiu di Corsou cu ta pushando e zonido original di Kompa y cu ‘den futuro’ por trece C-Shaw pa mas presentacion.

 Miho conoci como Mr. Kompa

Ta importante pa remarca cu danki na Stanley, Kompa ta birando masha popular na Corsou, Aruba, Boneiro y Hulanda. “Mi ta contento di mira con mas banda conoci a keda inspira door di mi”, Stanley a remarca. Por ehempel Buleria di Aruba recientemente a saca diferente Kompa cu a bira masha popular. Cantante Jayh Jawson, cu despues di a colabora cu Stanley Clementina riba ‘Wowo Cera’, y ‘Mijn Only’ na 2021, tambe a keda positivamente infecta cu e ‘Kompa Vibe’. Segun Stanley, despues di e exito di ‘Wowo Cera’, Jayh pronto lo saca mas Kompa. E ritmo Kompa tambe a cuminsa subi Hulanda, unda hasta e grupo Broederliefde ta bay saca un cantica. Awo na Hulanda nan a cuminsa yama Stanley ‘Mr. Kompa’, mirando su aporte y influencia. “Mi ta contento di mira hopi desaroyo den e area aki. Cu hopi a cuminsa reconoce e ritmo Kompa como esun original, cu a fungi como inspiracion pa otro ritmo manera Zouk, Ritmo Combina y Kizomba”, Stanley a splica.

Festival di Tumba

Pa Stanley su di tres participacion den Festival di Tumba, el a opta pa bay cu e banda hoben Excellence paso e ta kere cu jong por siña di
bieu y bieu por siña di jong. E banda a capta Stanley su atencion paso nan ta hopi dedica. “Aki cabuya bieu a conopa na cabuya nobo”, Stanley a splica. Alabes esaki tambe ta un oportunidad pa Stanley duna bek na nos hobennan. Su tumba a keda composita pa e famoso Doña Elia Isenia hunto cu Stanley mes, anto e conocedo musico Borrel Dopwell a haci e areglo. Durante e dianan binidero, Stanley lo duna mas detaye di e piesa y su mensahe, pues keda sigui Stanley riba su red social pa mas informacion.

Tambe Stanley lo haci algun presentacion chikito, durante su estadia na Corsou. Pa sigui Stanley su desaroyonan, por acudi na e pagina
social di Stanley Clementina na Facebook.com/stanley.clementina y Instagram @stanleyclementina.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.