fbpx
January 28, 2023

Taxi Boys a tene revancha contra Team Snor

Share on Facebook
Share on Whatsapp
0
0
Taxi Boys a tene revancha contra Team Snor
Taxi Boys a tene revancha contra Team Snor


Diasabra ultimo, 14 di januari, e tan spera “revancha di siglo” entre e conocido ekipo di domino Team Snor, bou liderazgo dje matematico den domino Nelson “Snor” Perez, y e grupo di taxista Taxi Boys a tuma luga den un ambiente super ameno y excitante. Aña a habri bon pa domino bush league n’e conocido palacio di domino aya n’e frontera entre Kudawecha y Calabas!

Manera cu e bataya a cuminsa, un y tur presente a sinti di biaha cu e anochi aki lo ta bay ta un bataya fuerte! Anochi ta habri cu sapato blanco ta cay ambos banda den tempo relampago y cu Taxi Boys hibando un bentaha leve na salida, pero c’un Team Snor dicidido y ful enfoca a tabla e wega den no time! Gran parti dje prome tempo a bay den tension estilo “un pa mi, un pa bo”, y e bataya a sigui sumamente pareu te na 8-8, ora cu a mustra cu Team Snor lo a bay domina e prome mita. Y e manera tabata di spera, unda e halftime a yega cu Team Snor ganando cu score di 11 – 9.

Durante pauze, manera di custumber, e pasapalonan a skeiro rond completamente gratis mientras Snor Perez a entrega e trofeonan personal di nan torneo Nos cu Nos n’e ganadonan ultimo den persona di Dr. Tico Dirksz y Tony Denny.

Segundo tempo a cuminsa y en berdad por a sinti varios cachete a bay suela di susto y “babucation” cerca fanaticada di Team Snor ora nan a wak e desaster cu Team Snor a sali cu ne! Tur e mannan cu a gana n’e prome mita di wega a perde, y capitan Snor Perez mes na timon dje barco a zwaai brasa manda laira den desesperacion ya cu e mes no por gana ningun wega.

Snor, kende prome cu wega a blof cu e tin carta nobo den baraha, mester a baha cabes pa e “Ace” cu Taxi Boys a bin cu ne, nada menos cu “Lord of the stones” Mo’ Yuchi Ras en bibo! Shonnan, na Hulanda nan lo a bisa “er is geen water om te wassen”! Mo’ Yuchi cu Mo’ Yoyo a planta respet! Cos a bira asina hot cu ora cierto fanatico di Taxi a cuminsa apoya, Snor den frustracion a grita “Y abo? Bo ta taxista? Cua taxi bo ta core?” Akinan mr. Sunny a contesta “ami ta core taxi 500!”

Sla tras di sla a cay y sin por haci nada contra e tsunami di taxista, Snor a bay abou cu score aplastante di 21 – 16! Pero shonnan, e cos aki a empata na 1-1, y ya caba ambos team a declara otro guera p’e siguiente revancha cu lo tuma luga dia 4 di februari proximo! Keda pendiente, “la cosa” ta bibo bibo ainda!

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.