fbpx
January 28, 2023

Ex-edificio di DOW a bira hotel pa choller

Share on Facebook
Share on Whatsapp
0
0
Ex-edificio di DOW a bira hotel pa choller
Ex-edificio di DOW a bira hotel pa choller


Manera cu tur hende lo por a anticipa, asina bo laga un edificio den Oranjestad cera pa mucho tempo, mesora e ta haya “doño”. E famoso adictonan ambulante ta keda purba, te ora nan logra penetra den e edificio y haci doño di dje. Ta esey mes ta sosodiendo awor na e ex-edificio di DOW situa den Paardenbaaistraat, dilanti port’i waf!

Aunke cu tin negosacionnan avansa andando entre Gobierno di Aruba y un compania estatal pa tum’e over, ainda e procedura legal no ta dje leu ey. Consecuentemente, ainda no por papia ni di un compra y pio di un “deal” pa drech’e, renob’e, restaur’e y eventualmente amplie. No ta premira cu esaki lo por concretisa pa e aña aki ainda tampoco, aunke cu ta purba.

Awe lectornan pendiente di e area a manda nos potret di con adictonan a logra drenta paden via un viaducto di airco (manera ta parce) y eyden por mira nan ta cana y drumi manera ta nan mes ta e “toro di cura”. Como cu no ta un luga cu ningun hende ta fiha paden, ainda autoridad no sa mes cu DOW a bira e hotel nobo pa acomoda e adictonan cu ta molestia turista den e area turistico.

Ta teme cu si no interveni, cera e buraco y core cu nan for di e area, cu nan ta apodera di e edificio, cu tin un balor ainda y caba cu ne. Den pasado por corda con a hasta kima e cas unda awe a bira Censo y Registro Civil. Mas Gobierno tarda pa activa y drecha e luga of bende of huur e, mas e keda para bandona, mas chens tin cu adictonan ta apodera y caba cu e edificio.

Ta urgi e departamento di gobierno, cu normalmente ta encarga cu tur edificio, esta DOW y DIP, pa tuma nota di e advertencia y salba e edificio prome cu ta laat. Tene cuenta cu e edificio ta situa dilanti Welcome Plaza, unda tur e riba 800 mil turistanan cu ta yega riba crucero tin cu pasa ora baha na Aruba. Regularmente e doñonan di kiosko eybanda ta sinti molester di ladronicia y adictonan pidiendo turista placa of purba bende nan droga. Awo nan a ripara dicon…e adictonan a haci nan mesun bida mas facil, a muda pa un edificio bandona cu a bira nan “hotel” awo!

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.