ORANJESTAD – Oficina di turismo di Aruba, ATA a duna prensa di Aruba diaranson un splicacion amplio di nan programa di 2022 y kico pa spera pa 2023. E mainta pa prensa a inicia cu un desayuno na Radisson Blue pa e cuerpo di prensa, pa despues e representantenan di ATA un pa un, duna nan respectivo presentacion. CEO di ATA, Ronella Croes a inicia esaki, y manera indica caba, a sali poco for di su forma di duna informacion, y a pone tur cos den un perspectiva realistico, sin sugar coat, y toch keda positivo cu loke cu tin. Enves di informa loke tin, a enfoca tambe riba kico nos mester haci aki, pa sigura cu unabez cu e turista yega, realmente e por disfruta di e loke e la wordo priminti y cu su experiencia ta realmente uno cu ta na Aruba so e por haya. Cu cifranan cu ta mustra un recuperacion di 117% compara cu 2019, cos ta mustra alentador, no obstante e retonan.
MERCADO INTERNACIONAL
Sanju Luidens a atende e parti internacional di mercadeo, enfocando riba e serie di video cu a keda produci pa e agencia cu ta representa Aruba den exterior, mustrando varios video cortico tanto na ingles, hulandes, y spaño, cu ta un mercado cu aworaki ta trahando ariba pa rebiba y haya e turistanan bek. Lemanan acogedor, acompaña pa musica corespondiente, por a mira cu e intento ta wordo haci realmente pa gara e mercadonan specifico y cu ta pinta e Aruba cu cualkier persona kier conoce.
Melanie Lopez a sigui cu su presentacion, ilustrando e aspecto di loke localmente ta haciendo cu e producto di Aruba, mustrando un pa un, tur e sitionan cu ta conociendo e cambio fisico. Y finalmente Patrick Melchiors tambe a duna su presentacion mustrando kico tur ATA a haci caba, y cu ta pone cu e producto ta funcionando. Na tur, un presentacion cu a duna un bista amplio riba e trabou di e oficina, y kico tur ta spera nos pa 2023.
