Di un inicio parlamento 10 y awo parlamento 11 a pone bon cla cu no tin consensus pa COHO. Nos no ta sostene e pensamento di un ley di consenso unda cu no tin consenso. E tin di ta bon cla, cu desde 2015 cu e malversacion di fondo di pueblo cu a guia na un KB pa Gabinete Eman, nos pais a cay den e loop di vigilancia di cerca pa pais Hulanda. Y den cierto forma nos por bisa cu tabata na su luga, pasobra a duplica e debe nacional di Aruba den 8 aña di tempo. Pero e posicion di Parlamento desde 2017 tabata cu nos ta un estado di derecho y tin cu respeta Aruba su parlamento y no por ‘bypass’di ningun manera, segun parlamentario di fraccion di MEP, Hendrik Tevreden..
Segun ley, no por bin un ley cu ta kita e derecho di un parlamento cu ta eligi democraticamente. Loke si por tin ta, conforme articulo 38 inciso 2 di Statuut, un acuerdo entre pais y specificamente entre gobierno di e paisnan. Pa parlamento cu ya tin añanan den debate cu parlamento di Hulanda riba e plataformanan manera entre otro IPKO tabata pa yega na un areglo pragmatico y mas balansa entre e paisnan ora ta trata e reformanan cu kier implementa. Aruba tabata sa di mas di dos decada caba cu mester reforma, cu mester bin cambio con ta maneha. P’esey a crea e documento ‘Repositioning Our Sails’ pa por duna contenido na loke t’e reformanan cu nos pais tin mester. Pero n’e momento cu bo reformanan ta kibra bo pais, pa motibo cu e peso di procedura ta mucho grandi pa ehecut’e di biaha den un solo bes, bo no ta yudando e causa. Esaki ta netamente loke COHO lo a nifica si el a ancra den un ley di Reino (Rijkswet), e parlamentario a enfatisa.
E ta sigui bisa: “Gobierno kier p’e reformanan realisa den forma responsabel teniendo cuenta cu e realidad di nos pais pero sigur tambe nos situacion socio-economico. Bo no por djis haci’e estilo di un optel som di hisa aki y baha aya, manera algun parlamentario den oposicion ta pretende, pasobra bo lo termina ta haci mas malo cu bon. Nos pais tin di reforma a base e realidad y vision cu a apunta y na un forma diligente y cu cautela. E unico rason cu nos no a duna consensus riba e ley di COHO ta, cu nos ta kere cu Hulanda a pone tur pais den reino riba mes un liña. Esaki no ta e realidad, pasobra tur pais tin un comienso y situacion diferente apesar di nos similaridad. Por ehempel Aruba, no tin debe cu Hulanda. Tampoco Hulanda a paga nos debenan, manera cu el a haci 10-10-10 pa St. Maarten y Corsou. Nos debe a crece asina grandi den e ultimo 8 añanan di Gabinete Eman. Pero di 1986 te cu 2009 el a permanece bou di 45% di nos ‘debt to GDP’. Pues pa hinca nos den un stramien aworaki, igual na St. Maarten y Corsou of horca nos pa un gabinete cu a malversa fondo di nos pais, siendo cu Caft tabata supervisa, no lo tabata husto y no lo a haya consensus.
P’esey den tur nos debatenan cu Tweede Kamer, nos a boga pa trata Aruba cu sinceridad y basa riba echo. Nos a boga pa duna Gobierno di Aruba y su maneho e beneficio di duda. Nos ta compronde cu mester di supervision y reforma pero ta di opinion cu esaki mester ta a base di colaboracion y cu apoyo unda cu nos mester. Nos ta contento pa awe biba e logro di parti Minister Presidente Wever-Croes cu ley di reino ta for di mesa y cu di awo padilanti e reformanan ta tuma luga a base di colaboracion entre e organisacionan di ehecucion entre e paisnan. Esaki ta e respet cu nos como pais autonomo merece.
