fbpx
January 28, 2023

Embassy Suites a anuncia cu nan ta cla pa habri nan portanan proximamente

Share on Facebook
Share on Whatsapp
0
0
Embassy Suites a anuncia cu nan ta cla pa habri nan portanan proximamente
Embassy Suites a anuncia cu nan ta cla pa habri nan portanan proximamente
Posted on 01/20/2023 9:47 am AST | Updated on 01/20/2023 9:47 am AST

PALM BEACH – E proyecto hotelero di mas di 130 miyon dollar Mericano, Embassy Suites by Hilton Aruba Resort & Casino ta cla pa habri su portanan proximamente. Asina e compania a anuncia e siman aki. Manera Noticiacla a raporta den varios instante, ta for di aña 2016 caba a start cu preparacionnan y desde 2018 e trabounan di construccion a cuminsa, planea pa keda cla na 2021. Pero debi na pandemia y e medidanan di distanciamento social, a stroba e proyecto y a tuma por lo menos dos aña mas pa por a keda cla. Awor e proyecto ta asina leu cu otro siman e prome huespednan ta yega Aruba, den forma di un “soft opening” mientras cu ta caba di finalisa tur detaye chikito.

E trahadonan, cu ta entretanto rond di 70 persona, gran mayoria local, ta entusiasma pa por cuminsa pone den practica tur locual nan a siña e ultimo lunanan. Nan lo crece segun e cambernan ta yena y ta anticipa pa ora e hotel ta den operacion completo, cu lo alcansa 300 empleado.

Pronto Embassy Suites by Hilton Aruba Resort & Casino lo yama bon bini na huespednan na e beachnan di Eagle Beach, un di e miho beachnan na mundo. Situa riba J.E. Irausquin Boulevard dilanti di e santonan blanco di Eagle Beach y aproximadamente seis miya for di aeropuerto, huespednan di e hotel lo disfruta di bistanan impresionante despeha di laman Caribe y di ta cerca na e atraccionnan principal, restaurant y luganan di entretenimento di e zona.

UN EMBASSY SUITES UNICO

Segun e compania, contrario na tur otro Embassy Suites na mundo, den caso di Aruba, a debuta un hotel na nivel “upscale”, conoci como e “all-suite” Embassy Suites by Hilton na Aruba. Doño di e edificio ta Natura Development NV, cu a cera un acuerdo di operacion cu Hilton. E edificio di 330 suite oceanfront Embassy Suites by Hilton Aruba Resort, ta marca e di dos hotel di Hilton riba nos isla y ta reenforsa e plannan continuo di expansion di e compania den Caribe.

UN HOTEL COMPLETO

E compleho di construccion nobo di 8 piso y 330 suite na Aruba, lo conta cu suitenan espacioso y exclusivo di Embassy Suites by Hilton, ekipa cu un sala apart, un camber priva y un minibar cu microwave, minifridge y koffiepot. E compleho lo brinda un espacio flexibel pa reunion di 6 mil pia cuadra, un spa di mas di 3000 pia cuadra, piscina den aire liber, un gym y casino, cu lo habri dentro di algun tempo mas. E hotel nobo lo ofrece un restaurant exclusivo, un bar y opcion di un grab-and-go dining pa un snack lihe. Huespednan tambe lo disfruta di servicionan exclusivo, cu ta inclui desayuno di cortesia prepara na bo gusto y recepcion anochi cu snacks y bebida.

TOCANTE EMBASSY BY HILTON

Embassy by Hilton, ta un di e 18 marcanan lider den e mercado di Hilton, cu ta dedica na ofrece loke ta mas importante pa e biahero. Servicio completo, accesibel y exclusivo ta loke e marca ta ofrece na biahero di placer y pa negoshi. Embassy Suites by Hilton ta number un den su clase, cu ta ofrece two-room suites, free made-to-order breakfast, open atrium, 24-hour fitness centers y complimentary evening reception. Embassy Suites by Hilton tin mas di 260 hotel y 42 propiedad den desaroyo. 

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.