fbpx
January 28, 2023

Abogado preparando protesta: Ex-minister Guillfred Besaril a haya retiro inmediato

Share on Facebook
Share on Whatsapp
0
0
Abogado preparando protesta: Ex-minister Guilfred Besaril a haya retiro inmediato
Abogado preparando protesta: Ex-minister Guilfred Besaril a haya retiro inmediato


Departamento di Recurso Humano (DRH) tabata buscand’e di aña pasa caba, pero no tabata sa su adres nobo na Aruba. Pero dia 16 di januari ultimo a localis’e y a entreg’e su carta di retiro den su man y el a firma p’e tambe. Mesora e periodo stipula pa entrega un protesta (verweer) ta cuminsa. Si no protesta, e ora e retiro ta drenta na vigor mesora. Pero Guillfred Besaril a dicidi cu e no ta keda cu su mannan crusa y ta bay guera contra “su” gobierno! 

Desde siman pasa a hinca e caso aki awo den man di abogado mr. Doris Canwood, cu ta un abogado bon conoci den casonan “high profile” manera ta esun di ex-minister Benny Sevinger, esta Avestruz. E tin un bon nocion y experencia den casonan penal y civil, den cual e aspecto “persecucion politico” ta hunga un rol cardinal. Su rol awor na principio lo ta pa bay den “verweer” contra e decision di minister-president mr. Evelyn Wever-Croes, den e periodo stipula den e carta di DRH. Despues di esey probablemente lo start e procedura civil pa kibra e contract di trabou, cu lo sosode den un caso dilanti un hues apunta pa atende “ambtenaaren zaken”. 

Cu e decision aki awo di Gabinete Wever-Croes II, ex-minister y alabes candidato di Partido MEP, Guillfred Besaril no por tuma ningun posicion den gobierno. Su trabou como polis y tur su añanan como empleado publico a bay perdi aki tambe. No ta ked’e otro opcion pa busca un futuro den sector priva. 

Besaril a retira pa motibo di placa pa yiu  

Guilfred Besaril a sigura den pasado cu e no tin problema cu Partido MEP ni cu Gabinete Wever-Croes II, sino simplemente un discusion cu DRH relaciona cu placa pa yiu, ta haci un diferencia grandi den su entrada. Esey banda di un realidad cu a subestima e trabou cu un baby ta trece cu ne. Ora combina e rol di tata di un baby cu e funcion di minister plenipotenciario, ta pone cu e peso ta inmanehabel. Cu e realidad ey riba mesa, el a opta pa tuma su retiro y busca direccion bek pa Aruba. Pero asina cu el a retira, a cuminsa sali hopi indicacion di un investigacion andando cu ta mustra dede den su direccion. 

CAD y DRH a constata hopi fayo

Hasta tabatin un reunion algun siman pasa den Parlamento di Aruba den cual tanto Centrale Accountants Dienst (CAD) y Departamento di Recurso Humano (DRH) a presenta tur su fayonan como mandatario den funcion. Ta e prome mandatario cu partido MEP a sacrifica asina, den e periodo di nan gobernacion. E acusacionnan ta basta pisa y facilmente por crusa caminda di ta un investigacion administrativo pa bira uno penal. No tin mucho diferencia den loke a acusa Alan Howell (POR) cu e lista largo cu ta colgando riba cabes di Besaril. Gobierno y Ministerio Publico a confirma cu tin un keho penal oficial entrega. 

Mal maneho den Aruba Huis

E departamentonan cu a conduci e investigacion den Aruba Huis a constata cu tin masha mal maneho eyden. Ambiente di trabou toxico, no tin training pa e personal, no tin coaching, mientras ch trahadonan ta yega ki ora cu nan kier trabou, ningun hende ta controla. Y pio ainda, a permiti diferente eilandjes politiek eyden cu ningun hende por bisa nan nada pasobra nan ta yama minister direct.

Cinco aña Minister Plenipotenciario

Diamars dia 21 di september 2021, Conseho di Minister a ratifica nombracion di dia 20 di november 2017 di Guillfred Besaril como Minister Plenipotenciario, staciona na Den Haag, Hulanda. El a reemplasa Juan David Yrausquin, cu a tuma e funcion over despues cu Alfonso Boekhoudt a tuma retiro pa bira Gobernador di Aruba. Besaril a sinta henter e prome gabinete, te ora cu el a cay seis luna prome cu tempo. 

A start gabinete Wever-Croes II forma e biaha aki entre MEP y Raiz cu apenas 11 asiento y atrobe Besaril a acepta dicho funcion na Hulanda. Pero, ata algun luna despues di a sigui den funcion, e mes a sali anuncia su retiro pa motibo personal. 

Tocante Guilfred Besaril 

Guilfred Besaril, cu originalmente ta un polis, a drenta sindicalismo y desde aña 2013 ta milita riba lista di MEP pa cual el a drenta Parlamento. Den su prome eleccion el a logra 833 voto, den eleccion 2017, su votonan a baha na 508 (-39%) y den eleccion na juni 2021 a logra solamente 203 (-60%) voto individual. Cu si e tin intencion di sigui den politica, no ta conoci. Pero cu e resultado aki riba mesa, ta nota cu desde su lansamento na 2013, ta atras so el a keda bay den cada eleccion.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.