ORANJESTAD – No ta solamente ambtenaarnan di gobierno a pidi pa kita e recorte salarial, pero awor tambe esnan den cuido medico a ‘pidi’ minister di Salud Dangui Oduber pa esaki tambe. Den un carta cu ta den poder di noticiacla, dirigi na e minister en cuestion, esnan den cuido medico a pidi pa e minister revoca e decision di recorte den AZV y tambe pa kita e recorte di 12.6% pa trahadonan di SABA. Contrario sinembargo na e sindicatonan, e trahadonan di cuido medico inicialmente no a pone un ultimatum. “Ta dun’e tempo pa haci e cos corecto” un di e firmantenan a sigura noticiacla.com. Despues a bisa cu ta duna e mandatario 2 siman di tempo cu ta suficiente. Mientrastanto awe diabierna RMR (Rijksminister Raad) a aproba pa gobierno di Aruba kita e recorte pa ambtenaar. Pero no ta haci mencion di e recorte pa cuio medico.
E CARTA
E carta ta cuminsa recorda cu tabata na juni di 2020 cu a introduci e recorte riba AZV, di 5.5% pa asina pa aña tin un recorte di 60 miyon den e seguro medico. Mescos a haci pa ambtenaarnan pero di 12.6%. “Mientrastanto pa medio di un ley di 29 di December 2022, prome minister (Wever:red) a anuncia cu e recorte ta wordo revoca. Nos ta pidi bo pa anuncia un mesun decision pa loke ta e instruccion cu a wordo impone riba AZV y cu pa 1 di januari 2023 nan tambe por revoca esaki. Y tambe e recorte pa trahadonan di 12.6% na SABA” e carta ta sigui bisa.
SOLIDARIO
E carta ta sigui bisa cu tabata solidario pa 2 aña y mei, cu tabatin efecto structural y maneho di cuido medico. A tuma nota cu cos a drecha remarcablemente cu economia di Aruba, y te hasta cu AZV no tin deficit mas y cu a crea te hasta un surplus. Como tal ta husto pa mescos cu a haci cu ambtenaar, pa elimina e recorte menciona pa cuido medico. “Nos ta spera un anuncio (similar) cu ta para e instruccion y lo kier tin un combersacion cu bo persona pa wak kico mester mas pa e aña aki riba e tereno di cuido” e carta ta finalisa bisando. Por lesa e carta completo AKI.
