Den careda di 10’or di mainta Aruba a experencia e prome blackout pa 2023. Por a mira un comunicado di WEB riba e blackout.
Asja Dongen, vocero di WEB Aruba NV a splica un blackout pa mas of menos 11’or y ainda no sa e causa specifico. Tin diferente sintoma di storing den e planta, pero ta dificil pa determina esey.
Sinembargo a cuminsa si cu e proceso di lanta e coriente bek. Ta dificil ainda pa bisa cuanto lo dura. Pa cada area e ta bay y pocopoco ta lant’e. No por lanta tur area pareu, sino e sistema no lo want’e.
E ta bay gradualmente. Dongen ta pendiente di su coleganan den camber di control y asina cu tin informacion prensa lo ta na altura y tambe lo tin informacion riba social media.
Dongen ta sigui splica cu WEB ta lanta e coriente via e feedernan, pero Elmar mester ta standby pa tuma over. Nan ta percura e ora pa sigui suministra e coriente pa tur e areanan.
Te aworaki e problema ta un storing den planta di produccion na WEB.
Te asina leu segun informacion suministra, coriente a cuminsa bin den diferente bario caba.
UPDATE:
Pa 12:11 PM, a indica cu a cuminsa suministra coriente den parti di Balashi, Bucuti y becindario. Y pa 12:14 pm a drenta informacion cu Pos Chikito, Savaneta Zuid y vecindario tambe a cuminsa haya coriente.
