Diaranson Aruba a ricibi un barco crucero unda cu tabatin mas cu cinco mil pasahero masculino gay. Tabatin un evento na Surfside Beach Bar, cual tabata uno tremendo, segun manager Rowi Rooijakkers.
“Nos a gosa hopi,” el a comenta. E turistanan tambe a gosa hopi. Tabatin mas of menos 500 gay. Nan mes a regla DJ y entertainment. Hasta nan a regla e bailadonan. E tabata hopi leuk, Rooijakkers a menciona.
E Beach Bar tabatin su propio siguridad, aunke nada no a pasa. E huespednan tabata hopi amabel y no a duna ningun dolor di cabes.
BENTA
Rooijakkers a menciona cu nan benta a bay hopi bon. No tabatin nada di keha. A laga hasta hopi tip atras, mas di loke nan ta ricibi normal. Esey tambe tabata bon, el a menciona.
ALGUN COMERCIANTE A RECLAMA
Di un otro banda, tabatin algun comerciante cu tin nan kiosco band’i waf, cu a keha cu pa nan e benta no a bay nada bon, ya cu e turistanan aki no a gasta ningun florin. Pa e beach bar, esaki a bay hopi bon.
Segun Rooijakkers, tur e turistanan aki a bay di biaha n’e beach bar y no a cana den stad manera tur otro turista.
NAN TA BON BINI
Si dicidi trece e barco crucero aki mas cu un biaha pa luna, Surfside Beach Bar ta ricibi nan cu brasa habri.
