ORANJESTAD – Aruba no ta cla ainda pa habri frontera aereo cu Venezuela pero ta practicamente cla pa esun maritimo. Esey por a compronde inoficialmente for di fuentenan den gobierno di Aruba e siman aki, ora cu a tuma nota di e decision di Corsou pa habri tanto frontera maritimo y aereo entrante 3 di April 2023. Noticiacla a compronde tambe cu den curso di dia awe diabierna, gobierno oficialmente por haci un anuncio riba e parti di reapertura maritime. Mientras cu no tin e fecha ainda pa e reapertura di frontera maritimo oficialmente, a compronde di e fuentenan cu esaki por sosode dentro di e proximo dos pa tres luna. Sinembargo e parti aereo ta keda un reto y lo dura un poco mas. Ta papia cu posiblemente mei por tin un reapertura di e parti maritimo, y porta te hasta mas prome. Den pasado caba Aruba a laga sa cu e situacion cu Corsou ta diferente y cu pesey ainda Aruba no ta asina leu pa bay pa e parti aereo.
REACCION
Hopi tabata e reaccionan cu a drenta ora cu a bira conoci cu Corsou si ta habri tur dos segmento di e frontera, y Aruba no. Hopi no por a compronde e distinccion aki y cu si habri uno, mester habri e otro pasobra ta un REino Hulandes tin y cu esaki ta un tema cu ta regarda Reino ya cu ta algo internacional. Sinembargo, Hulanda a laga sa caba cu esaki ta un aspecto netamente local, y cu ta keda na cada isla pa dicidi riba esaki. Hulanda a mustra su disponibilidad caba pa yuda cu e apertura, pero atrobe, ta keda na cada isla pa esaki sosode.
