Recientemente parlamentario Marco Berlis a reacciona den un conferencia di prensa riba punto nan menos bunita cu su opositor, Miguel Mansur a duna di conoce via un relato di prensa. Mansur a emiti un comunicado di prensa caminda a vocifera cu tin sectanan cristian contra democracia. Berlis por conclui cu Miguel Mansur di Accion 21 tin un problema hopi grandi. E ta sinti cu Mansur no por interpreta nos constitucion na e forma corecto.
Parce cu Mansur a vocifera cu e lidernan cristian a menasa den direccion di algun miembro di parlamento. Di otro banda Berlis a comenta cu; na ningun momento esaki tabata e caso. Mas bien e lidernan cristian a duna di conoce pa e pueblo tuma bon nota y no vota pa politiconan cu ta Pro matrimonio di mesun sexo.
Esaki no ta un menasa, segun Berlis. Locual si ta un menasa ta ora cu su persona y Hendrik Tevreden a ricibi menasa fuerte di hasta morto di nan y famia. Locual Mansur a vocifera no ta categorisa como un menasa.
“Mansur kier desinforma pueblo”, asina Marco Berlis a duna di conoce. Locual ta sosodiendo ta cu e miembronan di LGBTQ ta menasando diferente Pastor cu morto. Miguel Mansur ta un ignorante y no por compronde e materia, segun e parlamentario di fraccion geel den parlamento. E ta sinti cu Mansur tin cu informa su mes miho y stop di papia disparate den pueblo. Mansur ta papia di discriminacion mientras e ta pidi pa declara lidernan cristian ‘non grata’ riba nos pais.
