Despues di a warda basta tempo pa un luga nobo, por fin e agentenan policial ta mirando luz na final dje tunnel.
Manera cu ta conoci e warda di Playa tin un problema di schimmel (beskem) y esey tabatin consecuencia di salud pa hopi miembro di e cuerpo.
Diamars finalmente minister Rocco Tjon a core publica riba Facebook cu a tuma un decision final unda cu lo ubica e warda di polis pa Oranjestad, edificio situa den Paardenbaaistraat, unda cu e ex-consulado di Venezuela tabata. Un edificio cu a renoba completamente, cual sigur t’e miho luga pa nan.
Aunke e edificio ta mas chikito compara cu esun di Wilhelminastraat, pero no lo tin schimmel.
Sindicato di Polis (SPA) tabata hopi activo den e tumamento di decision, aunke cu esaki a bay cu basta reunion, accion, yen di corespondencia y mucho mas.
Durante un entrevista den noticiero Enfoke, Rolando Maduro, vice-presidente di e sindicato a dirigi su mes n’e miembronan, bisando danki. “E merito ta bay na bosonan como miembro di sindicato di polis. E merito ta di boso y no di Rocco y tampoco di Korpsleiding,” ta loke el a menciona.
Indirectamente a bisa e miembronan di polis via Facebook riba e decision. Eticamente como minister, e por a coy un telefon y avisa di e decision. Esey lo tabata lo corecto. E minister ta papia di un bon comunicacion, bon relacion hunto cu sindicato, pero ta via Facebook e sindicato a haya sa.
E bon cos ta cu for di e achterbaan, Paardenbaaistraat tabata e miho opcion, Maduro a menciona.
Segun presidente di SPA, Rodney Solognier, di tur e luganan cu nan a mira, e edificio aki en berdad tabata e solucion.
SPA a pusha tras di esaki. SPA mester a yama e doñonan di e edificio pa mira si berdad esaki tabata e realidad. Te ainda e minister no a yama e sindicato, ni sikiera un di e secretarianan informando cu e echo ta un realidad.
Aunke nan ta contento si, pasobra p’e miembronan ta algo nobo, e ta algo cu nan a desea pa hopi tempo.
Pa mas detaye lesa TREMPAN.
