fbpx
March 24, 2023

A habri inscripcion pa estudio basico pa por traha na wardacosta

Share on Facebook
Share on Whatsapp
0
0
Wardacosta a habri inscripcion pa Estudio Basico pa bira Agente di Wardacosta
Wardacosta a habri inscripcion pa Estudio Basico pa bira Agente di Wardacosta


Wardacosta ta informa hobennan entre 18 y 25 aña, cu tin e ambicion pa bira agente di wardacosta, pa inscribi nan mes pa e estudio basico pa bira agente di wardacosta (Basis Opleiding Kustwacht (BOK). E estudio basico ta un programa di estudio cu un duracion di 1 aña, consistiendo di vaknan practico y teoretico, incluso un training pa bira Agente Policial Extraordinario (Buitengewone Agent van de Politie, BAVPOL).

Tanto e hobennan masculino como femenino por inscribi pa e estudio di BOK. E estudio ta start cu un periodo di introduccion, asina yama ‘SamenSterk’. E meta di e periodo ‘SamenSterk’ ta cu e aspirant durante e periodo aki, lo crece tanto fisicamente como mentalmente y ta cera conoci cu e organisacion di Wardacosta. Durante e curso e aspirantnan ta ricibi habilidadnan basico, di entre otro EHBO (‘first aid’) y training cu arma. Tambe educacion nautico y vaknan di training basico di ekiponan di rescate, paga candela, legislacion di Wardacosta y manual di radio VHF, cual nan ta forma parti di e pakete di e estudio BOK. E condicion pa inscribi ta cu bo tin nacionalidad Hulandes, y cu bo ta inscribi na Aruba, Corsou, Sint Maarten of islanan BES, cu bo tin entre 18 y 25 aña di edad, na inicio di e curso, cu bo tin minimal un di e siguiente diplomanan: MAVO-4/ VMBO/VSBO-TKL/ L.T.S/ T-stroom/ EPB-door -stroom/ EPI of un diploma ekivalente na educacion secundario, cu bo tin un diploma di landamento, cu bo por lesa y skirbi Hulandes, cu bo tin un bon condicion fisico, cu bo no ta bisti bril of lens y cu bo no tin un ‘strafblad’.

Si bo ta interesa den e curso, bo por bishita e website di Wardacosta via www.kustwacht.org . Aki bo por drenta e parti di ‘Werken bij’ y haya mas informacion tocante e curso y sigui e link pa yega na e formulario di inscripcion. E curso ta start den augustus 2023.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.