ORANJESTAD – Stichting Onroerend Goed Aruba (SOGA) y e compania contratista general OHLA no ta sigui cu otro mas. Asina SOGA a informa e siman aki. Manera a conoci, SOGA recientemente a confirma cu tabatin paro di construccion na e proyecto di hospital, y e siman aki a actualisa e situacion.
SOGA a splica cu nan y e contratisa general OHLA a sinta na mesa y a yega na palabracionnan cu e partidonan no lo sigui cu otro mas y lo termina e contrato. E decision aki tabata uno mutuo y a wordo yega na un manera amical.
Den cuadro di esaki tambe a wordo palabra cu e sub-contratistanan por traha directamente cu SOGA, cualnan ta contratistanan local. SOGA a cuminsa haci preparacionnan necesario y a acerca e contratistanan local pa sinta na mesa pa yega na palabracion pa nan caba cu e ultimo parti cu falta di e construccion lo mas pronto posibel. Esey lo encera tambe cu SOGA lo mester evalua y posiblemente consulta cu su Stakeholders pa despues otorga e trabou na e contratistanan local.
SOGA a sigura cu nan tin e confianza cu dentro di algun siman lo por keda cla cu e contratistanan local y cu e trabou pendiente na HOH lo por reanuda lo mas pronto cu ta posibel.
