Consumidornan tabata menos pesimista, mirando cu e indice di confiansa di consumidor a subi cu 0,4 punto te na 94,2 den e di cuater trimester di 2022 (Grafiek 1).
Na final di e di cuater trimester, consumidornan tabata principalmente preocupa cu (i) e situacion di negoshinan y di economia lo deteriora (Q4-2022: 54 porciento, Q3-2022: 63 porciento), (ii) situacion financiero na cas lo empeora (Q4-2022: 45 porciento, Q3-2022: 33 porciento) y (iii) pa haya un trabou nobo ta mas dificil (Q4-2022: 38 porciento, Q3-2022: 49 porciento).
Ademas, 35 porciento di respondentenan a anticipa cu e posicion financiero di gobierno lo empeora den e di cuater trimester di 2022, esta 11 punto di porcentahe menos compara cu e trimester anterior (Q3-2022: 46 porciento). Aproximadamente 92 porciento di tur respondente a señala cu nan ta premira cu prijsnan lo ta mas halto den e proximo 6 lunanan (Q3-2022: 93 porciento).
E indice di e situacion actual a subi, esta cu 1.0 punto di indice te na 94,2 den e di cuater trimester di 2022, mientras cu e indice di expectativa a keda igual na 94,0 compara cu e trimester anterior. E cantidad di respondentenan cu a raporta cu compra di un auto no tabata conviniente a subi na 65 porciento den e di cuater trimester di 2022 (Q3-2022: 57 porciento), mientras cu 60 porciento a indica cu haci un prestamo no tabata adecua (Q3-2022: 53 porciento). Ademas, 58 porciento di respondentenan a indica cu tuma un hipoteca no tabata adecua (Q3-2022: 54 porciento).
Pa locual ta baymento cu vakantie 36 porciento di respondentenan a señala cu esaki no tabata conveniente (Q3-2022: 40 porciento). Consecuentemente, e indice di habito di consumidor a crece di 94,8 den e di tercer trimester di 2022 te na 95,1 den e di cuater trimester di 2022.
Informacion adicional riba e encuesta di confiansa di consumidor ta disponibel riba website di CBA (https://www.cbaruba.org/).
Tocante Banco Central di Aruba
E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel.
Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uzo di esaki.
Pa mas informacion tocante Banco Central di Aruba, por bishita su website www.cbaruba.org
