Dos miyon florin cu pueblo tin cu paga, esey ta, segun lider di fraccion di MAS, drs. Marisol Lopez-Tromp, e esencia di e ley cu a trata diahuebs den Parlamento; esey y cu tin como cuater minister envolvi.
E suma di casi dos miyon florin ta bin for di un procedura cu tin añanan andando y a origina ora cu ex Minister di Turismo Edison Briesen a firma na 2009 un contract cu e compania Mericano Lee Stefanelli & Associates Inc. pa e realisacion di un Aruba Music Festival.
Lopez-Tromp a splica cu door di cambio di gobierno, tabata un siguiente minister di turismo, esta Otmar Oduber lo mester a honra e contract, pero argumentando cu Briesen a actua contra ley di contabilidad, el a para esaki.
Posteriormente tabata ex Minister ing. Mike de Meza esun cu a tuma e cartera di turismo y a dicidi cu no ta sigui pleita e caso y a instrui abogado pa yega na un acuerdo. Siguiente cambio di gobierno a pone cu awe ta Minister Dangui Oduber tin e cartera, kende a duna di conoce cu Briesen no a comete ningun fout.
Mientras cu lesando for di e ultimo vonnis na 2017, Lopez-Tromp a remarca cu “Ni maske Hues a bisa cu mester respeta e acuerdo pasobra no tabatin motibo pa par’e, ta pidi extra atencion pa e responsabilidad personal y ministerial di e ex minister pa e hecho cu el a viola articulo 1. Di ley di contabilidad.”
Awo e realidad ta, pa e parlamentario di MAS, cu ta e pueblo pagado di belasting mester saca awo casi dos miyon florin pa un persona cu, te cu algun dia pasa, tabata consehero pa minister den e gabinete actual, pero mester a bay pa motibo di ta envolvi den un investigacion di corupcion.
E parlamentario ta interpreta e sentencia ariba menciona como cu ta Briesen mes tin cu pag’e, sinembargo MEP ta midi cu dos midi caminda Gabinete Wever-Croes II kier pa pueblo pag’e, mientras den pasado Minister Glenbert Croes mes mester a paga despues di a cera acuerdo cu WEB cu no tabatin conseho positivo of no tabata presupuesta.
Otro ehempel di trato desigual ta caminda a constata, pa medio di rapport, cu Besaril a comete acto financiero incorecto. Lopez-Tromp: “Na luga di entrega un keho, e si a haya un acuerdo di paga bek, prome cu Parlamento mes tabata informa di kico ta pasando, pasobra Evelyn Wever-Croes a gaña por escrito cu e rapport di CAD no tabata cla, mientras cu e tabatin e caba y despues a laga sa cu el a entreg’e na Ministerio Publico, pero en todo caso no a laga Parlamento wak e.”
