ORANJESTAD – E aeroliña Colombiano Wingo a cuminsa bende pasashi pa y for di Cali . Asina Aruba Airport Authority N.V., manehado y operado di Aeropuerto Internacional Reina Beatrix (Aruba Airport) a confirma atrobe diahuebs. E la confirma pues cu Wingo ta sigui expande su rutanan den Colombia. “Nos ta enthusiasma pa anuncia cu awe nos aerolinea partner, Wingo, a cuminsa bende pasashi pa y for di nan destinacion nobo, Cali – Colombia. Wingo ta un partner importante y valioso pa e aeropuerto di Aruba. Nos ta contento cu e ruta y servicio nobo for di Cali, Colombia. Asina nos a habri un otro ruta den Colombia. Nos ta sigui expande nos horizonte den Colombia y nos ta cla pa facilita nos partner Wingo den esaki, diversificando nos red den e mercado di Latino America”, asina Barbara Brown, Chief Revenue Development & Communications Officer na AUA Airport a duna di conoce.
BENTA DI PASASHI DESDE DIA 16 DI MAART 2023
E benta di pasashi pa e ruta nobo aki awor ta disponibel riba e website di Wingo, esta www.wingo.com, of via bo agencia di viahe preferi cu ta bende pasashi pa Wingo. Entrante dia 1 di juli 2023, Wingo lo cuminsa bula dos vuelo pa siman directamente pa y for di Cali, Colombia, riba diaranson y diasabra, cu nan avion B737-800 cu espacio pa acomoda 189 pasahero. E operacionnan aki ta traduci den aproximadamente 1500 stoel adicional pa y for di Aruba cu Wingo. Cu e servicio adicional aki desde dia 1 di juli 2023, awo Wingo lo opera shete vuelo pa siman for di Colombia, tres di Bogota, dos di Medellin y dos for di Cali.
