fbpx
April 01, 2023

Despues di cuater luna: Ainda polis no a caba di investiga accidente fatal

Share on Facebook
Share on Whatsapp
0
0
Despues di cuater luna: Ainda polis no a caba di investiga accidente fatal
Despues di cuater luna: Ainda polis no a caba di investiga accidente fatal


Aunke su nomber tabata poni riba rol diahuebs atardi, esaki tabata simplemente un formalidad, pasobra tratamento di e caso mes no a tuma luga.

Ta trata aki di e caso penal contra e mucha homber Dylan Kevin Cajas Guerrero, cu dia 27 di november 2022 a comete un acto cu lo cana cu ne pa resto di su bida. Door di stuur auto na un forma iresponsabel, el a kita bida di Ana Rosa Montaño Martinez di 60 aña.

E caso tabata poni riba rol, mescos cu diferente otro, pero pa motibo cu su abogado no a haya e proces-verbaal ainda, cu no ta completamente cla, no por a trat’e.Si a inform’e cu e acusacion contra dje ta cu el a comporta su mes di tal manera den trafico cu el a causa un accidente fatal. E comportacion den trafico a encera cu el a stuur sin rijbewijs, tabata bao influencia di alcohol, tabata asina cansa y cu soño, cu e no por a paga suficiente tino, no a keda na banda drechi di caminda, a core banda robes riba trottoir y a alcansa un peaton.

Ta acus’e tambe cu despues di tabata envolvi den un accidente di trafico riba e fecha menciona, a sigui core mientras e tabata sa of mester por tabata sa cu un persona a fayece, of tabata herida of a keda den estado desampara. Ta acus’e tambe di a stuur auto sin rijbewijs riba dia 27 di november 2022. Hues a pone e fecha di 26 di mei pa sigui cu tratamento. Por corda cu riba e dia ey tabatin dos accidente fatal. Esun mas tempran tabata di un musico Dominicano.

Den e caso aki tabata trata di un señora canando riba Linear Park na e otro banda di caminda cu e auto tabata core. Pero e chauffeur a hala ful na su otro banda, pasa dal e señora y sigui bay. Ta despues el a yama pa busc’e, pero no riba e mesun dia tampoco. Esaki a sosode despues cu 24ora.com a publica video di e sucedido. E señora a keda den un estado cu dificilmente por a scapa y probablemente ora cu tratamento di e caso tuma luga, lo haya sa tur e slanan cu el a ricibi, e sufrimento cu el a pasa den e ultimo momentonan di su bida.

Manera menciona, comunidad tabata den shock pasobra tabatin dos morto den trafico den menos cu 24 ora di tempo. Pio pasobra ora cu e sospechoso a yama polis pa e entrega su mes, cu a haci tur intento pa sconde e sospechoso y evita cu su potret ta sali den prensa. Polis a duna e sospechoso aki un trato preferencial cu ningun otro ta haya na momento di causa un desgracia fatal, bou influencia di alcohol y despues core bay tambe!

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.