Diabierna, dia 17 di maart, e Team di Investigacion Criminal RST, a aresta un miembro di Parlamento di Sint Maarten. Fuera di esey, e hues comisario (RC), a tene varios entrada hudicial n’e residencia di e sospechoso y na su luga di trabao den e edificio di Parlamento di Sint Maarten.
E detencion y e entradanan hudicial a tuma luga en conexion cu un investigacion penal yama “Lissabon”, pa cual ta sospecha e parlamentario di a acepta soborno y a abusa di su funcion. E investigacion ta andando y no lo descarta detencion of mas entrada hudicial.
E team Central di RST, bao di direccion di e Procurador General di Corsou, Sint Maarten, Boneiro, Sint Eustatius y Saba, ta ehecuta e investigacion aki.
E Team Central su enfoke ta riba un acercamento specialisa pa combati corupcion y di naturalesa criminal.
