Recientemente a tuma luga un acto lamentabel, un abuso di poder, di parti e Minister di Finansa di Corsou. E politico di partido MFK a nenga TV Direct di Corsou pa atende un conferencia di prensa den edificio di gobierno. Di e forma ey a nenga pa prensa por haya acceso na informacion y stroba nos pa eherce nos rol di “watch dog” pa comunidad.
Mesora despues di e susedido, Patrick Paskel y Nelson “Speed” Andrade a comenta riba e accion dictatorial aki, den cual minister ta abusa di su poder y ta haci un atentado contra libertad di prensa. A corda e mandatario pa keda cu si pianan na tera, pasobra e poder ey ta pasahero!
A conta con na Aruba tambe nos a conoce politiconan cu a pensa cu nan ta todopoderoso y por stroba funcionamento di prensa. Ady Thijsen por ehempel a nenga Nelson Andrade pa drenta Parlamento di Aruba. Headlines Group a hiba e politico dilanti hues y el a perde e caso y mester a duna 24ora.com acceso mesora na e edificio publico.
TV Direct a entrevista e presentadonan di Enfoke durante nan bishita na Boneiro e siman aki, relaciona cu nan comentarionan cu a haya hopi acogida na Corsou. A splica e coleganan cu nos semper ta cla pa sali na defenda di libertad di prensa, unda cu ta na mundo.
