Diaranson anochi a tuma luga den e auditorio di Cas di Cultura e evento di Poeta di Patria den su di nuebe edicion, c’un total di 31 inscripcion.
E edicion aki a surpasa tur expectativa, tabata tin mas inscripcion compara cu e otro añanan. C’un total di 31 inscripcion, pero dos participante a cay afo pa motibonan di salud y esey a haci cu tabata tin 29 participante. Compara cu aña pasa cu tabata tin 15 participante, e cantidad di participante a redobla. Asina Afranina Henriquez, di e Comision Celebracion Dianan Nacional, a expresa.
Comision ta sumamente orguyoso, ya cu e mundo literario por haya un anochi grandi pa nan presenta nan obranan. En principio na momento di inscribi, a informa cu por tin maximo di nuebe strofa. E tema semper ta Aruba, pero ta keda na cada participante por yena esaki cu su fantasia y creatividad, na e hurado ta keda na gusto di cada hende. Si e participante ta mara na e strofanan, e tema mester keda na Aruba y djey ta keda pa cada participante pa asina expresa su mes na su miho manera.
Cualkier pregunta por yama Departamento di Cultura, puntra pa Afranina y cu mucho gusto e lo sa di contesta cada pregunta. Pero tambe por manda un email na [email protected]. E lo zorg di contesta cada email ricibi.
Gran ganado di Poeta di Patria 2023, a resulta den persona di Rafael Garcia, cu a yega di participa tambe den Arte di Palabra. Pa Garcia, e ta un diferencia grandi. Di Arte di Palabra pa competencia di hobennan pa un competencia di patria cu ta pa adulto, ta un peso grandi cu ta dedica algo na bo isla. E ta algo mas grandi y mas pisa. Nervio sigur a hunga un rol hopi grandi, pero e resultadonan ta sin palabra.
Su poema tabata ‘Yiu di tera’, ken bo ta, un yiu di tera, un Arubiano di berdad y kico tur Aruba ta nifica y kico e ta pa tur esunnan cu ta biba riba e pida baranca aki.
E persona cu a yud’e cu e poesia aki tabata Elsa Krosendijk,cu a haci su participacion den Poeta di Patria 2023.
Por ultimo, Rafael a bisa pa uza nos lenga papiamento, nos tin cu balor’e y tin e na bida tambe. No tin hopi hende cu ta papie. Arte di Palabra ta un bon plataforma pa cuminsa cu ne y sigui cu Poeta di Patria, si esey ta den interes di e persona. Pero semper, balora nos idioma papiamento.
