Tabata dies aña pasa, riba un 17 di maart, cu Roland y Laraine Arends a cuminsa c’un aventura hunto. A habri Roadside Cafe situa riba Linear Park. Diabierna anochi a celebra cu varios amigo y cliente fiel di Roadside Cafe, cu a bin hunto pa e ocasion aki.
Laraine Arends, un di e propietarionan, a cuminsa na bisa cu durante e dies añanan aki nan a topa cu hopi ups and downs pero no tin nada mas di keha mirando cu e resto di cosnan a bay bon pa nan.
E nomber Roadside Cafe tabata escogencia di un di e yiunan di e pareha Arends. Laraine por corda cu tin un luga na Corsou cu tin e mesun nomber. E famia a gusta e nomber aki y ta p’esey a scoge p’e.
No por keda sin menciona cu locual ta atrae tur e clientenan di Roadside Cafe ta e miho cheeseballs, kroket y loempia na Aruba.
Tur dia ta algo diferente y nobo pa famia Arends na Roadside Cafe. A lo largo di e añanan nan a cera conoci cu hopi cliente nobo y asina a cera un bunita amistad. Tin cierto dia ta druk y tin dia no, pero no por laga afo cu semper ta algo nobo. Esunnan cu conoce y sa bishita frecuente, sa cu semper nan lo topa Rolly y Laraine cu un smile cla pa sirbi nan.
Roadside Cafe a bira un centro di entretenimiento di Aruba, pa grandi y chikito, caminda por sinta trankil, pa come algo, pa bebe algo y pa pasa bon. Por ultimo Laraine y Roland Arends a yama danki na tur cliente cu a sostene nan durante e dies añanan aki y ta spera di por conta cu nan pa hopi aña mas.
